MÜALİCƏ MÜƏSSİSƏLƏRİNDƏ CƏRRAHİ YARA İNFEKSİYALARI TÖRƏDİCİLƏRİNİN XÜSUSİYYƏTLƏRİ

Xülasə

Məqalədə cərrahi yara infeksiyalarının etioloji agentlərinin və onların antimikrob preparatlara həssaslıq və rezistentliyinin araşdırılması məqsədilə aparılmış tədqiqat işi haqqında məlumat verilmişdir. Tədqiqat 2019-2022-ci illərdə Azərbaycan Tibb Universitetinin Tədris Cərrahiyyə klinikasında müalicə almış xəstələr üzərində aparılmışdır. Cərrahi əməliyyatlardan sonra baş verən yara infeksiyaları zamanı yara, drenaj və abses möhtəviyyatların mikrobioloji müayinəsi nəticəsində cərrahi yara infeksiyalarının əsas törədicilərinin S.aureus, P.aeruginosa, E.coli, Klebsiella cinsli bakteriyalar, eləcə də Candida cinsli göbələklər olduğu müəyyən edilmişdir. P.aeruginosa, E.coli vəKlebsiella cinsli bakteriyalar əksər antibiotiklərə davamlı olması ilə fərqlənmişlər. E.coli və Klebsiella cinsli bakteriya ştammlarının əksəriyyətində genişlənmiş spektrli betalaktamaza (GSBL), P.aeruginosa ştammlarının təqribən yarısında induksiya olunan beta-laktamaza (İsBL) produksiyası aşkar edilmişdir.