ONKOLOJİ XƏSTƏLƏRDƏ İNFEKSİON AĞIRLAŞMALARIN ETİOLOJİ STRUKTURU

Xülasə

Məqalədə süd vəzisi xərçəngi olan xəstələrdə törənən iltihabi ağırlaşmaların mikrobioloji monitorinqi ilə bağlı məlumat təqdim edilir. Süd vəzisinin xərçəngi zamanı infeksion ağırlaşmaların törədicilərinin etioloji strukturunun öyrənilməsi məqsədilə bu diaqnozla müalicə edilən 40 qadının (əsas qrup) və 10 praktik sağlam şəxsin (kontrol qrupu) bioloji nümunələrində bakterioloji müayinələr aparılmışdır. Xərçəng xəstələrinin bioloji mayelərində K.pneumoniae, P.aeruginosa, E.coli, və s. kimi mikrooqanizm növləri aşkar edilmiş və mümkün ağırlaşmalar üçün xarakterik ola biləcək markerlərin müəyyənləşdirilməsi istiqamətində araşdirmalar həyata keçirilmişdir. Əsas tədqiqat qrupunda Klebsiella spp. və Staphylococcus spp. kimi mikroorqanizmlərin assosiasiyası aşkar edilmişdir, həmçinin eyni qrupda 5,0% hallarda Escherichia coli ilə / Klebsiella spp. mikrob assosiasiyaları müşahidə edilmişdir. Assosiasiya halında olan başqa mikroorqanizmlər 5%-dən çox olmamışdır, məsələn, Pseudomonas spp. / Enterococcus spp. assosiasiyası daha az, yalnız 2,5% hallarda müşaidə edilmişdir. Müəlliflərin fikrincə kimyəvi müalicə alan pasiyentlərdə infeksion ağırlaşmaları müəyyənləşdirilməsi və profilaktikası, həmçinin bağırsağın mikrobiosenozu və selikli qişasına sitostatiklərin toksik təsirlərinin zəiflədilməsi üçün mədə-bağırsaq traktının mikrobiosenozunun tərkib dəyişikliklərinin qiymətləndirilməsi məqsədəuyğun hesab edilə bilər.