SARS-CoV-2 VİRUS İNFEKSİYASI KEÇİRMİŞ XƏSTƏLƏRDƏ ASTENİK ƏLAMƏTLƏRİN QİYMƏTLƏNDİRİLMƏSİ

Xülasə

Məqalədə yaşı 31 ilə 65 yaş arasında olan COVID-19 infeksiyası keçirmiş 172 xəstədə aşkar edilmiş astenik əlamətlər və onlarda xəstəlikdən sonrakı 6 və 12-ci aylarda müşahidə edilmiş dəyişikliklər haqqında məlumat verilmişdir. Müşahidələr göstərmişdir ki, COVID-19 infeksiyasından sonra astenik sindrom, müşahidə edilən xəstələrdə yuxu pozulmaları, vegetativ əlamətlər və digər nevroloji simptomlar daha çox təzahür edir. İlk altı ayda xəstələrin 54,7±3,8%-də yerişin pozulması, 23,8±3,2%-də qoxu hissinin iy və dadbilmənin zəifləməsi, 14,5±2,7%-də yaddaşın zəifləməsi, 66,3±3,6%-də diqqət problemləri və 45,9±3,8% də hissi pozulmalar qeydə alınmışdır. Göstərilən əlamətlər xəstələnmədən 12 ay sonra rekonvalessentlərin əksəriyyətində aradan qalxmışdır və alınmış nəticələrin ilkin göstəricilərlə müqayisəsində statistik etibarlı fərq müşahidə edilmişdir. Alınan nəticələr COVID-19-dan sonra astenik sindromun determinantlarının və proqnozlaşdırıcılarının hərtərəfli öyrənilməsini, həmçinin diferensiasiya üçün həm risk qruplarında, həm də digər xəstə qruplarında müəyyən edilməsini və araşdırılmasını tələb edir.