FİBROLAMELYAR HEPATOSELLULYAR KARSİNOMA

М.Т. Orucov; E.T. Şamdancı; Ə.B. Həsənov

doi:10.34921/amj.2023.3.028

Müəlliflər

М.Т. Orucov Azərbaycan Tibb Universitetinin
E.T. Şamdancı Gazi Universiteti
Ə.B. Həsənov Azərbaycan Tibb Universitetinin

DOI

https://doi.org/10.34921/amj.2023.3.028

Açar sözlər

fibrolamelyar hepatosellulyar karsinoma, histopatologiya, immunhistokimya, molekulyar patologiya

Xülasə

Məqalədə müəlliflərin klinik şəraitdə müşahidə etdikləri fibrolamelyar hepatosellulyar karsinomalı (FL-HSK) xəstə haqqında məlumat və bu xəstəlik haqqında ədəbiyyat xülasəsi təqdim edilir. 37 yaşlı kişinin qaraciyərinin sağ payındakı kütlədən alınmış tru-cut biopsiya materialının patohistoloji müayinəsi zamanı lamelyar fibroz daxilində yerləşmiş şiş hüceyrələri aşkar edilmişdir. İmmunhistokimyəvi olaraq şiş hüceyrələri PanCK, sitokeratin 7, CD68, IX karboanhidraza və qlütamin sintetaza əks-cisimləri ilə pozitiv boyanmışdır. Vimentin ilə boyanmadığı halda, CD34 ilə sinusoidal kapilyarizasiya və CD10 ilə fokal kanalikulyar boyanma müəyyən edilmişdir. Xəstəyə FL-HSK diaqnozu qoyulmuş, sağ lobektomiya əməliyyatı icra olunmuş və çıxarılmış şişin patoloji müayinəsində ilk diaqnoz təsdiq edilmişdir.
Ədəbiyyat xülasəsində FL-HSK-nın epidemioloji, klinik, radioloji, patoloji, immunhistokimyəvi və molekulyar xüsusiyyətləri qeyd edilir. FL-HSK fərqli morfoloji və klinik xüsusiyyətləri ilə HSK-nın histoloji variantı hesab olunur. Qaraciyər rezeksiyasına uğramış FL-HSK-lı xəstələrdə hepatosellulyar karsinomanın qeyri-fibrolamelyar subtipi olan xəstələrlə müqayisədə 5-illik yaşama göstəriciləri əhəmiyyətli dərəcədə yüksəkdir. Müəlliflərin fikrincə, gələcək tədqiqatlarda FL-HSK-lı xəstələrdə qaraciyər rezeksiyası və qaraciyər transplantasiyasının effektivliyini müqayisə etmək çox vacibdir.