MÜXTƏLİF YAŞ QRUPLARINDAN OLAN QADINLARIN YUMURTALIQ XƏRÇƏNGİNİN RİSK AMİLLƏRİ VƏ SİMPTOMLARI HAQQINDA MƏLUMATLILIQ SƏVİYYƏSİ

Xülasə

Məqalədə müxtəlif yaş qruplarına aid olan qadınların yumurtalıq xərçənginin (YX) simptomlarının və risk faktorlarının məlumatlılıq səviyyəsinin fərqli xüsusiyyətlərini öyrənmək məqsədilə aparılmış tədqiqat işi haqqında məlumat verilmişdir. O-CAM (Ovarian Cancer Awareness Measure) vasitələri istifadə edilərək hazırlanan anket əsaslı sorğu müxtəlif yaş qrupundan olan 250 iştirakçıya onlayn şəkildə təqdim edilmişdir. Ümumi maarifləndirmə və demoqrafik-klinik amillər arasındakı əlaqə Chi-square testi ilə qiymətləndirilmişdir. Sorğuda iştirak edənlər, əsasən, gənclər olmuşdur, belə ki, tədqiqat qrupunun 55,2%nin (n=138) yaşı 20-30 intervalında, 4,0%-nin (n=10) yaşı isə 50-dən yuxarı olmuşdur. İştirakçıların 65,6%-i (n=164) YX haqqında ümumi məlumatları olduğunu bildirmişdir. Ən çox müşahidə edilən simptomlar qarında şişkinlik (41,6%, n=104) və ağrı/böyümə (41,2%, n=103) idi. Tədqiq edilənlərin əksəriyyəti ailədə xərçəng xəstəliyi anamnezinin önəmli risk amili olduğunu bilmədiyini qeyd etmişdir. İştirakçıların yaşı ilə YX haqqında ümumi maariflənmə səviyyəsi arasında statistik əhəmiyyətli əlaqə aşkar edilmişdir (p<0,05), daha gənc yaş qrupları arasında xəstəlik haqqında məlumatlılıq daha yüksək olmuşdur. 250 iştirakçı ilə keçirilmiş bu sorğuda YX haqqında ümumi məlumatlılıq nisbətən yüksək olsa da, spesifik risk faktorları barəsində informasiyalarının yetərli olmadığı diqqət çəkmişdir. Müəlliflərin fikrincə, gələcəkdə həyata keçirilən ictimai səhiyyə proqramlarında bu boşluq aradan qaldırmalıdır.