SARS-CoV-2 VİRUS İNFEKSİYASI ZAMANI QASTROİNTESTİNAL POZULMALAR

Xülasə

Məqalədə qastroenteroloji əlamətlərlə, o cümlədən diareya ilə gedən SARS-CoV-2 virus infekiyasının klinik-laborator xüsusiyyətlərini araşdırmaq məqsədilə aparılmış tədqiqat işi haqqıda məlumat verilmişdir. COVİD-19 infeksiyası diaqnozu ilə müalicə olunmuş, respirator əlamətlərlə yanaşı mədəbağırsaq pozulmaları müşahidə edilən 30-69 yaşı olan 58 xəstədə demoqrafik göstəricilər, premorbid fon xəstəlikləri, qastrointestinal əlamətlər, stasionarda müalicə müddəti, stasionara daxil olarkan bədən temperaturu, dəqiqəlik tənəffüsün sayı, SpO2 səviyyəsi araşdırılmışdır. Qanda ferritinin, D-dimerin, C-reaktiv zülalın səviyyəsi, hemoqram, koaqoloqram öyrənilmiş, ağciyərlərin kompyuter tomoqrafiyası aparılmışdır. COVİD-19 infeksiyasının diaqnozu burun-udlaqdan götürülmüş materialda ZPR üsulu ilə virus RNT-sinin aşkar edilməsi ilə təsdiq edilmişdir. Nəticələr variasion statistika üsulu ilə işlənmişdir. Tədqiqat göstərmişdir ki, xəstələrin 53,4%-də mədə-bağırsaq pozulmaları və respirator əlamətlər eyni vaxtda təzahür etmişdir. 10,3%-də isə erkən dövrdə yalnız qastrointestinal əlamətlərl müşahidə edilmiş və 2-3-cü gündən respirator əlamətlər qoşulmuşdur. Qastrointestinal əlamətlərdən anoreksiya xəstələrin – 58,6%-də, ishal – 44,8%-də, mədə bulanması – 37,9%-də, qusma – 10,3%-də, qarında qurultu – 6,9%-də, ağrı – 5,2%-də müşahidə edilmişdir. Qarında qurultu və ağrı kimi əlamətlər yalnız ishal olan xəstələrdə meydana çıxmışdır. İshal əsasən cavanlarda, yalnız 15,4% halda yaşı 50 və daha yuxarı olanlarda qeyd olunmuşdur. Laborator müayinələrin nəticələrinin təhlili zamanı diareyalı xəstələrdə leykositoza, limfopeniyaya və trombositopeniyaya meyllik, neytrofillərin sayının artması, EÇS-in sürətlənməsi diqqəti daha çox cəlb etmişdir. CRZ, D-dimer, ferritin səviyyəsi nəzərəçarpacaq dərəcədə artmış, protrombin indeksi azalmışdır. Diareyalı xəstələrdə SARS-CoV-2 infeksiyası ağır gedişli olmuş və kritik vəziyyətlərin inkişaf ehtimalının yüksəkliyi ilə təzahür etmişdir. Stasionarda müalicə dövrü və virusun orqanizmdən eliminasiya müddəti daha uzun çəkmişdir.