AZƏRBAYCANIN İŞĞALDAN AZAD EDİLMİŞ ƏRAZİLƏRİNDƏ DAĞINIQ SKLEROZUN YAYILMASI

Xülasə

Məqalədə Qarabağ və Şərgi Zəngəzur iqtisadi rayonlarında dağınıq sklerozun (DS) yayılmasının və klinik gedişinə görə tiplərinin xüsusi çəkisini araşdırmaq məqsədilə aparılmış tədqiqat işi haqqında məlumat verilmişdir. 10 il (01.01.2013-31.12.2022) ərzində Azərbaycan Respublikası Səhiyyə Nazirliyinin Nevroloji Mərkəzində xüsusi ekspert komissiyası tərəfindən adı çəkilən iqtisadi rayonlardan DS diaqnozlu 224 xəstə müayinə edilmiş və tibbi sənədləri araşdırılmışdır. Diaqnoz qoyularkən xəstələrin orta yaşı 34,81±7,78 olmuşdur. DS-nin klinik tipləri arasında daha çox rast gəlinən residivverən DS (80,4%) və ikincili proqressivləşən DS (15,2%) olmuşdur. Tədqiqat müddətinin sonuna regionda DS-in yayılması 100000 nəfərə 20,83±1,42 (95% CI – 18,05-23,61) olmuşdur. Qadınlar arasında DS-nin yayılması kişilərlə müqayisədə əhəmiyyətli dərəcədə yüksək olmuşdur – p<0,001.