BÖYRƏKLƏRİN QEYRİ-DİABET MƏNŞƏLİ XRONİK XƏSTƏLİYİ ZAMANI ENDOTELİN FUNKSİONAL VƏZİYYƏTİNƏ EMPAQLİFLOZİNİN TƏSİRİ

Xülasə

Məqalədə qeyri-diabet mənşəli xronik böyrək xəstəliyinin 1-3-cü mərhəsi olan xəstələrində (XBX) Empaqliflozinin endoteldən asılı vazodilatasiyaya (EAVD) təsirini müxtəlif aspektlərdən öyrənilmək məqsədilə aparılmış tədqiqat işi haqqdında məlumat verilmişdir. Tədqiqata 1-3-cü mərhələ XBX olan, böyrək biopsiyası ilə qlomerulonefrit diaqnozu təsdiqlənmiş 120 xəstə cəlb edilmişdir. Xəstələr XBX mərhələsinə görə üç qrupa bölünmüş və hər qrup özlüyündə iki yarımqrupa ayrılmışdır: A yarımqrupu empaqliflozin 10 mq qəbul edənlər, B yarımqrupu isə yalnız əsas müalicə alanlar. Müalicə başlanmazdan əvvəl və 3 ay sonra EAVD reaktiv hiperemiya testi ilə ölçülmüşdür.
Nəticələr göstərmişdir ki, empaqliflozin alan xəstələrdə EAVD səviyyəsində əhəmiyyətli yaxşılaşma müşahidə olunmuşdur. Xüsusilə, 3A yarımqrupunda müalicədən sonra EAVD-nin normal həddə qalxma faizi 17,4%-dən 56,25%-ə qədər artmışdır (p<0,0001). 2A yarımqrupunda isə bu göstərici 45,5%-dən 91,9%-ə çatmışdır (p><0,0001). Əksinə, empaqliflozin almayan xəstələrdə EAVD səviyyəsində əhəmiyyətli dəyişiklik qeydə alınmamışdır (p > 0,05).
Beləliklə, empaqliflozinin qeyri-diabetik XBX olan şəxslərdə endotelin funksional vəziyyətini yaxşılaşdır dığı və damarların vazodilatasiya qabiliyyətini artırdığı müəyyən edilmişdir. Bu nəticələr, II-ci tip natrium qlükoza kotransporterin inhibitorlarının qeyri-diabetik XBX xəstələri üçün də faydalı ola biləcəyini göstərir.