COVID-19 PANDEMİYASININ MÜXTƏLİF XƏSTƏLİKLƏRLƏ ƏLAQƏLİ İZAFİ ÖLÜM RİSKİNƏ TƏSİRİ

Xülasə

Məqalədə COVID-19 pandemiyası ilə əlaqəli ölüm səbəblərindən asılı olan izafi ölüm hadisələrinin tezliyini qiymətləndirmək məqsədilə aparılmış tədqiqat işi haqqında məlumat verilmişdir. Tədqiqatda 2018–2022-ci illər üzrə Azərbaycanda əhalinin ölüm səviyyəsinə dair rəsmi statistik materiallardan istifadə edilmişdir. Ölüm hallarının artım tempi, orta illik ölüm halları və artıq ölüm səviyyəsi qiymətləndirilmişdir. Tədqiqat göstərmişdir ki, Azərbaycanda 2019–2022-ci illər ərzində 2018-ci illə müqayisədə ölüm hallarının artım tempi 97,7–134,3% intervalında dəyişmişdir. Ən yüksək artım tempi bəzi yoluxucu və parazitar xəstəliklərlə (884,4%) əlaqəli olmuşdur. 2022-ci ildə də yoluxucu xəstəliklər, sinir sistemi xəstəlikləri və dəqiqləşdirilməmiş səbəblər (simptom və sindromlar) nəticəsində ölüm səviyyəsi yüksək qalmışdır. Beləliklə, Azərbaycanda COVID-19 pandemiyası dövründə yoluxucu xəstəliklər, tənəffüs sistemi, qan dövranı sistemi, sinir sistemi xəstəlikləri və dəqiqləşdirilməmiş səbəblər nəticəsində əhalinin ölüm səviyyəsində artım müşahidə edilmişdir. Orta illik ölüm artımı səviyyəsi qan dövranı sistemi xəstəlikləri üzrə 0,828‰, yoluxucu xəstəliklər üzrə 0,566‰, dəqiqləşdirilməmiş səbəblər üzrə 0,122‰, bütün səbəblər üzrə isə 1,95‰ olmuşdur.