AZƏRBAYCAN RESPUBLİKASININ GƏNCƏ ŞƏHƏRİNDƏ 2005-2009 VƏ 2019-2024-сü İLLƏRDƏ QEYDƏ ALINAN EPİLEPSİYALI PASİYENTLƏRİN XƏSTƏLİYİN KLİNİK TİPLƏRİNƏ GÖRƏ MÜQAYİSƏLİ TƏHLİLİ

Xülasə

2005-2009 və 2019–2024-cü illər ərzində Gəncə şəhərində qeydə alınmış epilepsiyalı xəstələrdə xəstəliyin klinik xüsusiyyətləri və epilepsiya tiplərinin paylanma dinamikası müqayisəli şəkildə təhlil edilmişdir. Tədqiqata cəlb edilən pasiyentlərdə əsas üstünlük təşkil edən forma fokal simptomatik epilepsiya olmuş, lakin bu forma zamanla azalmağa meyl etmişdir. Generalizə olunmuş epilepsiya hallarının əhəmiyyətli dərəcədə artdığı (10,0% → 27,1%) müşahidə edilmişdir. Xüsusilə gicgah və alın paylarında müşahidə edilən simptomatik epilepsiyalar əvvəlki dövrlə müqayisədə azalsa da, ümumi strukturda hələ də üstünlük təşkil edir. Eyni zamanda, fokal idiopatik epilepsiya əvvəllər yalnız alın payında müşahidə edildiyi halda, son dövrdə beyin qabığının müxtəlif bölgələrində də qeydə alınması diaqnostik imkanların genişləndiyini göstərir. Tədqiqat göstərmişdir ki, Gəncə şəhərində epilepsiyanın yayılma sıxlığı müxtəlif amillərdən asılı olaraq dəyişikliyə uğrayır. Gəncə şəhərində 2005-2009 və 2019-2024-cü illərdə epilepsiya ilə əlaqəli tibbi məlumatların müqayisəli analizi, həm bu dövrlər ərzində xəstələrin klinik formalarının necə dəyişdiyini, həm də bu dəyişikliklərin müalicə metodları və diaqnostik yanaşmalarla əlaqəsini araşdırmağı hədəfləyir.