1 YAŞINA QƏDƏR REANİMASİYA ŞÖBƏSİNƏ QƏBUL EDİLƏN XƏSTƏLƏR ARASINDA ANADANGƏLMƏ ANOMALİYALARIN RASTGƏLİNMƏ TEZLİYİ

Xülasə

Məqalədə 4 il ərzində (2019-2022-ci illər) K.Y.Fərəcova adına Elmi-Tədqiqat Pediatriya İnstitutuna (ETPİ) kritik vəziyyətdə anadangəlmə anomaliya diaqnozu ilə qəbul edilən 1 yaşı tamam olmamış 1256 xəstənin anomaliyanın tipinə, sistemlərə görə, illər və bölgələr üzrə paylanması, ölən xəstələrin təhlili araşdırılmışdır. Anomaliyanın olduğu sistemlərə görə ilk yeri ürək-damar sistemi anomaliyaları, sonrakı yerləri mədə-bağırsaq və sinir sistemi anomaliyaları təşkil etmişdir. Kritik vəziyyətdə reanimasiya bölməsində müalicə alan anadangəlmə anomaliyası olan xəstələr ölkənin müxtəlif iqtisadi rayonlarından qəbul edilmişdir. Ən çox xəstə Bakı və Abşeron-Xızı (547 nəfər), ən az isə Naxçıvan bölgəsindən (15 nəfər) qeydə alınmışdır. Digər bölgələr üzrə xəstə sayı 62-241 aralığında dəyişmişdir (Pχ2=0,842). Dövlət Statistika Komitəsindən (DSK) əldə edilən məlumatlara əsasən, 1 yaşa qədər əhalinin sayı ilə müqayisəli təhlil aparılmış və illər üzrə statistik fərqlilik müəyyən olunmuşdur. Nəticə olaraq, kritik vəziyyətdə anadangəlmə anomaliya diaqnozlu 1 yaşa qədər xəstələrin rastgəlinmə tezliyinin illər üzrə müqayisəli təhlilində əhəmiyyətli fərq olduğu aşkar edilmişdir ki, bu da COVID-19 pandemiyasının təsiri ilə izah edilməlidir. Aparılmış təhlil nəticəsində Bakı, Abşeron-Xızı iqtisadi rayonunda kritik vəziyyətdə anadangəlmə anomaliya diaqnozu ilə reanimasiya şöbəsinə qəbul edilən xəstə sayının digər bölgələrə nisbətən daha çox olduğu müəyyən edilmişdir.