ÖZ BOYU HÜNDÜRLÜYÜNDƏN SƏTH ÜZƏRİNƏ YIXILMA NƏTİCƏSİNDƏ TÖRƏNƏN KƏLLƏ SINIQLARININ MƏHKƏMƏ-TİBBİ ASPEKTLƏRİ

Xülasə

Məqalədə insanın “öz boyu hündürlüyündən” səth üzərinə yıxılması zamanı kəllə sümüklərində meydana çıxan sınıqlara səbəb olan amillərin qiymətləndirilməsi məqsədilə aparılmış tədqiqatın nəticələri əks etdirilmişdir. Tədqiqat işində 2006-2023-cü illər ərzində Bakı şəhəri üzrə 190 zərərçəkmiş şəxsin “öz boyu hündürlüyündən” səth üzərinə yıxılması halları araşdırılmışdır. Zərərçəkmiş şəxslər 6 yaş qrupuna bölünmüşdür: <20, 20-29, 30-39, 40-49, 50-59 və ≥60 yaş. “Öz boyu hündürlüyündən” yıxılanlardan 65 nəfərdə (34,21%) kəllə sümüklərinin sınıqları aşkar edilmişdir və bunlardan 58 nəfər (89,23%) ölmüşdür. Ölən şəxslərin əksəriyyəti (65,52%) küçədə və bədənin yan səthləri üzərinə yıxılanlardır (46,55%). Eyni zamanda, ölənlərdən 56 nəfərdə (96,55%) kəllədaxili zədələnmə aşkar edilmişdir. Bu da kəllə sümüklərinin sınıqları zamanı ölüm faizinin yüksək olmasının kəllədaxili zədələnmələrlə əlaqədar olduğunu göstərir.