AZƏRBAYCAN XƏZƏR DƏNİZ GƏMİÇİLİYİ QAPALI SƏHMDAR CƏMİYYƏTİNDƏ PEŞƏ FƏALİYYƏTİ ÜÇÜN TİBBİ ƏKS-GÖSTƏRİŞLƏRİN YAYILMASI

Xülasə

Məqalədə Azərbaycan Xəzər Dəniz Gəmiçiliyi Qapalı Səhmdar Cəmiyyətində (AXDG QSC) kompleks tibbi müayinələr əsasında əmək fəaliyyəti üçün əks-göstərişlərin tezliyini, nozoloji strukturunu, xarakterini qiymətləndirmək məqsədilə aparılmış tədqiqat işi haqqında məlumat verilmişdir. AXDG QSC-nin əməkdaşlarının peşə fəaliyyətinə yararsızlığına səbəb olan nozoloji formanın bütün səbəblər arasında payı və onların işçilər arasında yayılma səviyyəsi kimi göstəricilər hesablanmışdır.
Tədqiqatın nəticələri göstərmişdir ki, tibbi əks-göstərişlərin böyük qismi iki qrup patologiya – endokrin sistemin (əsasən şəkərli diabet) və qan dövranı sisteminin xəstəlikləri (əsasən arterial hipertenziya, ürəyin işemiya xəstəliyi) ilə bağlıdır. Digər siniflər üzrə xəstəliklərin tibbi əks-göstərişlər arasında payı xeyli azdır. AXDG-QSC də işçilər arasında əks-göstərişlərin yayılma səviyyəsi çox yüksəkdir, 1000 nəfər işçiyə 65,33±2,48 xəstəlik düşür. Əmək fəaliyyəti üçün tibbi əks-göstərişlərin ən çox yayıldığı müəssisə Bibiheybət Gəmi Təmiri Zavodudur (GTZ). Burada xəstələnmə səviyyəsi digər müəssisələrinin müvafiq göstəricilərindən statistik etibarlı dərəcədə çoxdur. Müəssisələr arasında tibbi əks-göstərişlərin yayılmasını formalaşdıran əsasən endokrin sistem, qan dövranı sistemi, göz və onun əlavə aparatının xəstəlikləridir.