BAKI ŞƏHƏRİNDƏ UŞAQLAR ARASINDA NOROVİRUS İNFEKSİYASININ EPİDEMİOLOJİ XÜSUSİYYƏTLƏRİ

Xülasə

Bakı şəhərində uşaqlar arasında norovirus infeksiyasının bəzi epidemioloji xüsusiyyətlərinin öyrənilməsinə dair tədqiqatın nəticələri təqdim edilmişdir. Tədqiqat işi uşaqlar arasında müxtəlif yaş və cins qruplarında, mövsümdən asılı bağırsaq patologiyası ilə müşayiət edilən norovirus infeksiyasının rastgəlmə tezliyini müəyyən etmək və epidemik xarakterini müəyyənləşdirmək məqsədilə aparılmışdır. Bakı şəhərində müxtəlif uşaq xəstəxanalarına daxil olmuş yaşı 18-ə qədər olan 411 xəstə uşaq bəzi bağırsaq virusları – A qrup rotaviruslar, 40/41 tip serotip adenovirus və norovirus – immunferment analiz üsulu ilə müayinə edilmişdir. 1-3 yaş qrupunda norovirus infeksiyasının maksimal aşkarolunma səviyyəsi 35,4±3,0% olmuşdur. Norovirus infeksiyasının aşkaredilmə tezliyi qızlarla (43,9±3,2%) müqayisədə oğlanlar (56,1±3,2%) arasında daha yüksək olmuşdur. Norovirus infeksiyası yaz mövsümündə (46,7±3,2%), payız mövsümündə müşahidə edilmişdir (11,4±2,0%). Norovirus infeksiyası zamanı epidemik prosesin dövrü olaraq il ərzində demək olar ki, bütün fəsillərdə qeydə alınan xəstələnmənin epidemik yüksəlişi və azalması ilə 2 yüksək və bir aşağı amplitudlu tsikllərdən ibarət olduğu görünür. 2018-ci ildə 2 virus assosiasiyası arasında RV±NV – 8,5%, AdV+NV – 6,8% və RV+AdV – 10,2% təsadüfdə, 3 virus assosiasiyası RV+AdV+NV 6,8% müşahidə edilmişdir. 2019-cu ildə 2 virus assosiasiyası RV+NV – 5,5%, AdV+NV – 20,8% və RV+AdV – 8,2% olmaqla qeydə alınmışdır. 3 virus assosiasiyası RV+AdV+NV – 5,1% halda təsdiqlənmişdir. 2020-ci ildə 2 virus assosiasiyası RV+NV – 15,3%, AdV+NV – 23,7% və RV+AdV xəstələrin 8,5%-də aşkar edilmişdir. 3 virus assosiasiyası RV+AdV+NV – 5,1% olmaqla identifikasiya edilmişdir.