DİSSİRKULYATOR ENSEFALOPATİYALI XƏSTƏLƏRİN AMBULATOR TİBBİ REABİLİTASİYASI ZAMANI FİZİKİ MÜALİCƏ AMİLLƏRİNİN İSTİFADƏ EDİLMƏSİNİN EFFEKTİVLİYİ

Xülasə

Məqalədə dissirkulyator ensefalopatiyalı xəstələrin fiziki müalicə amilləri vasitəsilə müalicəsinin ambulator mərhələsində tibbi reabilitasiyanın effektivliyini aydınlaşdırmaq məqsədilə aparılmış tədqiqat işi haqqında məlumat verilmişdir. I mərhələdə dissirkulyator ensefalopatiyası olan 90 xəstə üzərində müşahidə aparılmış, xəstələr 3 qrupa bölünmüşdür: 1) kontrol qrupda xəstələr standart farmakoterapiya (xolin-alfosserat, asetilkarnitin) almışlar; 2) müayisə qrupuna daxil edilmiş xəstələrə əlavə olaraq yod-brom vannası təyin edilmişdir; 3) əsas qrupda isə xəstələrə müqayisə qrupundakı müalicədən başqa, dəyişən impulslu aşağıtezlikli və yüksəktezlikli elektrostatik sahənin təsiri təyin edilmişdir (dərin ossilyasiya və ya “Xivamat-terapiya” metodu. Müalicənin effektivliyi neyropsixoloji göstəricilərin, beyin hemodinamikasının, lipid mübadiləsinin və həyat keyfiyyəti əlamətlərinin müşahidə edilməsi əsasında qiymətləndirilmişdir. Reabilitasiyaedici müalicənin yaxın və uzaq dövrlərində əldə edilmiş klinik, biokimyəvi və neyrofizioloji göstəricilərin statistik təhlilindən aydın olmuşdur ki, müalicə prosesinə ambulator (3- cü mərhələ) tibbi reabilitasiya üsulunun əlavə edilməsi orqanizmin pozulmuş funksiyasının – psixoemosional statusun, koqnitiv funksiyanın, beyində qan cərəyanının, lipid mübadiləsi göstəricilərinin yaxşılaşmasına şərait yaradır və bunun nəticəsində xəstələrin həyat keyfiyyəti də əhəmiyyətli dəyişikliklərə uğrayır